嚟緊幾星期，《咖喱牛腩》會同大家展望歐洲各大聯賽，呢個星期就先講德甲。冠軍拜仁慕尼黑喺轉會窗冇乜大收購，仲放走埋舒韋恩史迪加，主要係買咗杜格拉斯哥斯達返嚟，呢位前薩克達球員嘅實力唔算好頂級，未見到哥迪奧拿（圖）諗到乜招突破瓶頸。
兩年前，最強球隊遇上最強教練，哥迪奧拿執教拜仁，令人期待。小弟都好想睇吓德國足球嘅精髓點樣滲入西班牙嘅元素，但兩年過去，無論係打法定成績，哥迪奧拿嘅拜仁頂多叫做啱啱合格。下季係哥迪奧拿同拜仁合約嘅最後一年，如果佢唔能夠突破呢兩年嘅困局，相信好大機會完約後走人。雖然拜仁嚟緊冇咗小豬，但防中仲好多人，最大問題始終係兩翼。踢法上，哥迪奧拿最初移植巴塞隆拿嗰套，不斷微調，例如哥帥麾下嘅巴塞係靠美斯中路突破，但拜仁冇呢個人，最後都係靠洛賓同列貝利兩翼去波。
洛賓、列貝利年紀大，成日受傷，冇佢哋喺度，拜仁進攻差好多，考慮到兩大飛翼只會續走下坡，拜仁今夏嘅轉會目標應該係搵啲當打、有能力直接取代佢哋嘅人，而杜格拉斯哥斯達實力一般，輪換吓可以，但未夠班頂列貝利個位，好心森馬落多兩錢肉緊啦！上季，小弟覺得哥迪奧拿已經有啲走火入魔，睇佢份出場名單，係估唔到佢想打咩陣式，連踢3-3-3-1都試過，美其名就兵無常勢、水無常形，但佢喺巴塞嗰陣都未試過咁玩法，有時真係懷疑佢拎拜仁嚟做實驗。
文：咖喱