無綫新聞部員工逃亡潮，竟然仲未完結！舊年有份聯署抗議新聞部刪除七警喺暗角「拳打腳踢」字眼嘅記者陳亮均，原來都同無綫Say Goodbye。
陳亮均喺facebook臨別贈言，佢貼咗幾張入行後唔同時期嘅工作照，留言話7年嚟，「每天睡醒上班都在實踐自己的夢想，其實是很幸福的事」；曾經喺兩間電視台做過記者，經歷過立法會選舉、特首選舉、79天嘅佔領、四川雅安地震、茂名反PX示威，仲試過問：「（梁振英）你係咪當選就唔答記者問題？」佢話大大小小新聞事件，畢生難忘。
之不過，佢話過去大半年，「身邊戰友逐一離開，踏上不同的路，感嘆之餘也成就了思考前路的契機」，因此決定換跑道出去睇新世界，「記者之路暫止於此」，多謝所有人呢7年嚟嘅鼎力相助。
《講清講楚》何文雯離職
八方聽聞，經常同政商界嘉賓《講清講楚》嘅現任助理採訪主任何文雯，下個月都會離開無綫，轉職至大企業。查實如果一間公司係好嘅話，點解有咁多員工離職呢？