無綫前主播陳珍妮喺今年書展推出新書《TVB新聞部血淚史》，大爆喺無綫新聞部打工嘅辛酸，佢日前喺中環接受本報嘅訪問，直言話離職之後，嗰晚即刻喺fb unfriend咗一半同事，佢又喺本書度揞名爆管理層樹先生、上司S，甚至眾主播嘅事，唔少人睇完之後，即刻喺度玩猜猜他/她是誰，對於大家嘅回應，陳珍妮前晚喺fb話：「問心無愧，此心可昭日月。」
人嘅本質有問題
陳珍妮好坦白話最令佢難受嘅係主播W同主播M：「我接受咗自己唔係老闆最鍾意嗰個，但係唔好太過份囉，真係上有好者，下必甚焉。一個人之所以可以坐大，其實都係因為俾上司縱容到咁。所謂喜唔喜歡、得唔得到佢歡心，同佢嘅表現係完全冇關係嘅。」喺佢筆下嘅主播同事，有人周身名牌，有人間中喜愛夜蒲，亦有人鍾意飲兩杯，但係陳珍妮覺得呢啲都唔係問題，問題在於人嘅本質：「我唔會覺得講粗口嘅人係唔好，反而我覺得偽善嘅人仲可怕。主播都只係普通人，佢都有佢哋嘅需要，亦都唔係你想像中咁好或者咁唔好。」
離開咗嘅新聞小花黃紫盈接受訪問，聽到陳珍妮本書內容有揞名爆料，紫盈話：「吓，係呀？係咪寫得爆啲吸引人睇，我唔擔心被爆，同佢都有兩句。是是非非唔需要介懷，得啖笑，唔需要太在意，當茶餘飯後笑話，始終單方面寫嘅，聽吓、睇吓，娛樂就算，唔需要當真。」
撰文：馮仁昭
