阿爺落柯打救市，在兩星期出30招下，雖然取得階段性成效，但呢兩日仍有餘震，且睇嚟餘震未了。昨日內地公佈第二季GDP成功保七，好過市場預期，卻未能扭轉劣勢，滬綜指收跌3%，退守3800關。究其原因，主要有三：預期穿七帶來更多救市措施的冀望落空；股民趁復牌潮沽貨逃生；A股ETF出現大量贖回，外資也出逃。
明日係內地期指結算日，亦係出動公安調查惡意沽空後的首次結算，市場觀望氣氛濃厚。場外形勢比場內更兇險，在新加坡交易的富時中國A50期指，下周四結算，即月未平倉合約仍有超過50萬張，好誇張。雖然《人民日報》4月21日話「4000點才是A股牛市的開端」，但救市聯軍想將A股托上4000樓上企穩，談何容易。
本來作為價值投資者，股市非理性下跌，就係買入時機，應該遵守紀律，但我在上周三港股大跌2,000點當日冇撿便宜貨。波動市操盤，心理質素好重要。《孫子兵法》話，要贏「務在先服其心」，克服內心各種障礙，亦即西方所謂inner game to success。當日外電指索羅斯來了香港，國際大鱷戙喺度，堅有風險，我仲係做唔到克服心魔。
萬科現金充裕
A股保衞戰未過，H股中期業績就殺到。昨日內地公佈上半年商品房銷售增10%，房地產開發投資增4.6%；加上日前百城房價指數顯示，6月房價按月上升的城市超過半數，反映內地樓市正在復蘇，內房股龍頭萬科（2202）成績表應該唔差。
本周一，萬科董事長王石在外灘國際金融峯會指，萬科正由銷售商向服務商轉型，料10年後員工人數將由目前的4萬人增至100萬人，屆時人員缺口將達四成，將由機器人頂崗。萬科已開發無人駕駛汽車，明年機器人夜間巡邏保安會投放市場。
阿爺吹雞為國護盤，萬科即公佈將動用最多100億元人民幣回購公司A股，每股回購價不超過13.7元人民幣。雖然係回購A股，唔係H股，但13.7元人民幣（約17.1港元）揭示公司認為股價唔應該低於此價。除回購，董事王文金自掏腰包增持。
萬科現金充裕先有能力回購，其他內房股唔少債台高築，只會考慮集資，遑論回購或增持捍衞股價。此外，萬科亦有深港通概念，如果梁振英真係爭取到深港通如期開通，對股價有刺激作用。早幾日麥格理和瑞信就相繼發表報告唱好。萬科H股同A股一向較為貼價，估計A股仲有餘震，可候回至17.1元或樓下超值區低吸。
割柑人
本欄逢周四刊登