熟悉內地時政、人稱「夫子」嘅時事評論員劉銳紹（圖），今年書展有新搞作，推出一本名為《慾奴，牢獄》嘅政治小說，更命名為「人性邊緣系列」。
採訪政治新聞30多年嘅夫子，話小說當中有唔少人似曾相識，包括佢曾親身見證嘅官場「擦鞋」故事，但強調今次只係小說，唔希望有人對號入座喎。
對於小說中點名提到梁振英，會唔會擔心被認定對傳媒較小器、過往多次向傳媒發律師信嘅CY追殺？夫子就話如果有人係都要無限上綱，佢就只能話係杯弓蛇影，又笑指香港如果淪落咁嘅地步，就正正反映今次呢本小說，反映現時歪曲嘅香港政治生態，「如果有人硬要對號入座，只能話係當代文字獄嘅最佳例子」。原來佢推出小說前，已就內容特別請教過法律界人士，唔覺會構成法律問題。