書展開鑼，唔少家長陪同仔女一齊入場搵好書，今年有本好啱家長睇嘅書，就係《全能爸B》，由8位Daddy講吓湊B經，其中民政事務局政治助理徐英偉Caspar、自由黨主席鍾國斌Felix及公民黨立法會議員陳家洛，噚日親臨會展分享心得。
育有分別4歲同兩歲囝囝嘅Caspar，喺怪獸家長熱潮下建議大家變風箏家長，唔使吓吓管到仔女咁實，放吓手畀佢哋自由發揮。而佢嘅湊B心得竟然係要錫老婆，如果賢內助一齊分憂，確係湊得更得心應手。Felix就大嘆好失落，事關讀大學嘅囡囡，𠵱家唔使老竇車佢。而有5個仔女嘅陳家洛就獲全場讚有心有力。