亞洲球迷市場呢個肥豬肉，英超都食咗好多年，不過唔代表德甲、西甲等歐洲聯賽會放棄，特別係德國人講效率，制度話改就改，好似周五夜場，一早已經推行，英超講到口水乾，下季先會有，拜仁慕尼黑、多蒙特等德甲傳統強隊，又喺亞洲好多城市設立辦公室，專門吸納球迷，德甲受歡迎程度都日增。
不過講足球比賽，球員先至係重點，德甲吸引亞洲人嘅其中因素，就真係比較多亞洲人效力，特別係日本南韓兩大亞洲強國，日本國家隊外流兵差唔多一半喺德國搵食，好似香川真司、長谷部誠、內田篤人等等，國內人氣王武藤嘉紀新一季又會去緬恩斯。中國自02年世界盃後，有一輪出國潮，之後因為國家隊水準下滑，中國球員立足歐洲頂級聯賽已經少之又少，上季出到個張稀哲（圖）加盟禾夫斯堡，大大增加咗中國球迷對德甲嘅關心程度，不過呢股熱潮睇嚟好快就會熄。
張稀哲上季被笑似汽車銷售員多過球員，四月禾堡對史浩克04嘅前列大戰前夕，張稀哲反而返到中國出席上海汽車展，幫禾堡嘅車廠母公司宣傳，佢事後就話自己好唔願意，又話係球會命令。早排德甲球隊開操，張稀哲喺禾堡熱身賽有啲表現，交出助攻，雖然叫做有好開始，但係似乎禾堡都認為佢對球隊嘅價值唔大。張稀哲日前親口承認，正同北京國安傾緊回歸事宜，禮拜三亦落實返國安，結束半年嘅外流生涯。坐咗半年冷板，學佢話齋，德甲又好，中超又好，都係可以落場踢波緊要啲。
文：牽牛