李嘉欣老公許晉亨係本地老牌發展商中建企業嘅家族成員，呢個家族雖然低調，但其實一直有積極投資物業市場，比較出名係早年投資九龍站豪宅凱旋門，最近佢哋更加一擲2.7億元，向信置（083）大手買入九龍灣國際交易中心一層寫字樓。
許晉亨同許建中、許建德一班許氏家族成員，透過紹威有限公司，喺上月19日買入國際交易中心6樓，面積有近2.7萬方呎，呎價1.01萬元。呢個單位月租收入約70萬元，投資回報超過3厘，比起豪宅平均得2厘幾仲要高。
難怪佢哋由舊年底開始放售一批豪宅，包括西半山寶翠園、柏道2號同大角嘴海桃灣等，套現近1.4億元，𠵱家轉而投資回報較高嘅寫字樓亦好啱數。