梁振英要搞創新科技局，過最後一關，誓要財委會通過撥款，IT科技界人士利益所在，自然贊成，包括電腦賓架M在內。有咗一個面向「科技」（主要係IT電腦）嘅政府部門，業內人士唔多唔少，點都會得益分到餅仔嘅，唔贊成先至奇，道理與一啲醫生堅決拒絕劍橋牛津醫科畢業生，免考試回港行醫一樣，雖則佢地嘅老師可能與李國章一樣，係劍橋醫學院產品。
其實政府如要推動科技，商務及經濟發展局屬下已有部門可推動，做乜要成立一個新局？電子工業界陳其鑣博士在電視台論壇大力反對成立創科局，講得好實在，冇人可以駁到佢，講完。
喬布斯搞蘋果電腦，史丹福畢業生創辦Yahoo、Google，哈佛退學生朱克伯格辦Facebook，何來美國創科局支持幫忙？新加坡政府就大力支持鼓勵創新科技啦，至今有乜驚世成就？
其實香港可以成為亞洲創業之都，唔駛政府主動幫手。電腦賓架M講及之OS Vehicle由意大利青年創辦，當中有一位係華僑子弟，賓架M曾與佢地傾偈，問佢地點解由意大利走嚟香港創業？咦，答案熟口熟面到連香港人自己都唔記得咯，就係：香港稅率低，開公司容易到極，政府少管制，鄰近亞洲富裕國家，交通通訊極發達，出入境自由，本港有不少歐洲人……仲有，訂貨可以上深圳東莞，交貨快捷妥當，就係咁，佢地在亞洲稍作研究，就好快決定香港係最佳創業城市。
呢間公司嘅營業模式聽講係：你要歐美新車咩？要等好耐呀？排隊一兩年先至有車呀，唔駛等嘞，上網訂車，所有汽車零件（包括車身），有珠三角汽車零件廠預製組件，打包送到你嘅指定地點，自己去好似砌宜家傢俬咁，自己安裝一架新車出嚟。汽車工業當然唔會喜歡呢啲賣車模式，將來可能有對抗性行動，但意大利年青人夠想像力，夠膽做，又有集資支持（香港係亞洲私募基金/創投基金中心），咁咪去改變世界囉。得悉呢個故事後，左丁山好佩服，自己諗極都唔識諗嘅嘢，人地廿零歲仔已遠渡重洋，來港開公司試圖去「顛覆」汽車工業。做呢啲事如果申請甚麼「創科局」資金或技術支持，怕要等上年幾兩年，蚊都瞓啦！