聞戰鼓思良將，呢排立法會財務委員會陷入拉布戰，到底特首梁振英嘅「寶貝」創新及科技局，能否趕及喺暑假前通過？好快就揭曉，但呢次拉布戰就畀機會財委會主席張宇人示範功架。
話說公民黨陳家洛上周去信張宇人，要求對方叫政府派特首創科顧問楊偉雄出席財委會回應相關撥款問題。陳家洛同花生友講，佢呢一着可能殺張一個措手不及，畀着以往吳亮星做財委會主席嘅話，可能二話不說、一口拒絕，然後激起泛民不滿。但係張宇人冇咁做，佢唔單止諮詢議員意見，仲喺大比數反對邀請楊偉雄、得一位議員建議開會討論邀唔邀嘅情況下，決定開會討論。
陳家洛讚高招
回帶睇番，前日張宇人仲話不如唔好立即討論請楊偉雄一事，於是被陳家洛鬧佢議而不決。但事隔一日，張宇人今日就開個半鐘頭特別會議傾呢件事。家洛讚張宇人今次高招，一來並無好似吳亮星咁自把自為，反而畀足機會議員暢所欲言，而加開特別會議唔會影響到陷入拉布戰嘅財委會，再者眾所周知，如果財委會要投票決定請唔請楊偉雄，人數佔優嘅建制派贏硬，而張最後作決定要加開，就唔會順得哥情失嫂意。
至於張宇人就對加開會議一事一笑置之，最受拉布之苦嘅佢仲笑笑口反問花生友：「你覺得我好辛苦咩？」嗱，張宇人呢次示範作，或者解釋到點解佢值得攞金紫荊星章。
花生友