已請辭立法會議員嘅民主思路召集人湯家驊Ronny噚日以內務委員會副主席身份，最後一次出席內會嘅年度記者會。Ronny會後同八方講，唔做議員後會重新喺法律界大展拳腳，密密接case搵真銀。但想搵湯狀打官司嘅客仔唔好開心住，因為Ronny最近已加價。
難道走「第三條道路」會令身價暴漲？非也，Ronny話，佢秘書同佢講，由於佢投身政界十幾年，已同法律市場脫節，唔少比佢資歷仲淺嘅大狀，收費仲貴，所以叫Ronny快啲加價。Ronny因此應秘書要求即時加價。
至於佢籌組嘅智庫民主思路，至今有人口頭承諾嘅捐款有200、300萬，但係大額捐款則尚未到手，佢話希望最終籌到600萬開檔，請兩至三個人，透露已喺炮台山租咗地方做民主思路嘅辦公室。