政圈最近興靠抽水上位、堅「抽」嗰隻「抽」喎，一直關心時事嘅歌手龍小菌，噚日亦加入抽水行列，將楊千嬅名曲《可惜我是水瓶座》，改詞成為《可惜我是水喉匠》，放喺facebook4粒鐘，已經有近4萬點擊率，可見市民幾咁飲水思「鉛」。
八方相信首歌獲市民爆like，多得龍小菌嘅改詞內容好啜核，當中民記元秋被抽到乾塘，民記另一位議員Tree根亦中伏，「用了大陸來貨 你個鉛秋毒我 你老公獨立非執董無搞清楚」、「蔣姓氏阿芸 你若能（弱能）陷害世人」同「儍儍地再飲 若再飲 變Tree根」，短短幾句都寸到佢兩個應一應。雖然歌詞抵死，但最多網民讚嘅係龍小菌唱呢首歌時，竟然可以忍住唔笑。