利物浦今夏第一場熱身賽旗開得勝，喺曼谷以4:0輕取泰國明星隊。除咗羅拔圖法明奴外，其餘五個新兵都有上陣，上半場先有前鋒丹尼艾格斯、後衞約瑟高美斯同埋門將阿當保丹披甲。紅軍三分鐘就由拿沙馬高域開紀錄。23分鐘，艾格斯接應傳中一射，可惜角度太正被撲出，攞唔到處子入波。完半場前，中堅馬馬度沙高接應角球頂入，為利物浦拉開到2:0。下半場突然落起大雨，利物浦亦換晒成隊，到尼達利基尼、占士米拿同大家見面，仲有新隊長佐敦軒達臣㖭！52分鐘，利物浦靠拉爾拉拿射成3:0，之後由奧歷治埋齋大勝4:0完場。
史達寧體測將投藍月
另外，過檔曼城嘅紅軍「反骨仔」史達寧繼續俾利迷鬧爆，仲有位激進嘅網民話要綁架佢三歲嘅囡囡，嚇到英國警方都要介入調查。至於史達寧禮拜二就喺曼徹斯特嘅醫院體測，相信好快就正式加盟曼城。
識睇，一定係睇足英台【英波Live】：
http://soccer.appledaily.com
http://bit.ly/engballlive