有「新興市場之父」之稱嘅麥樸思今年78歲，近日決定唔再擔任鄧普頓新興市場投資信託嘅首席投資經理，唔通佢要退休？
唔使緊張，麥樸思只係唔做首席投資經理，但仍然會以投資經理身份，繼續協助接任嘅Carlos Hardenberg，而且仲會保留鄧普頓新興市場集團主席一職；有關變動將於今年10月1日起生效。
官方說法，當然話呢啲變動好正常。麥樸思話，集團每隔一段時間就會檢討投資管理，並按客戶最大利益作出改變，佢跟集團一路研究點樣投資係最好。
可惜，鄧普頓新興市場投資信託近年表現差就係事實，呢個信託過去5年，每年表現跌0.3%，跑輸同業指標1.9%增長。
麥樸思由1989年成立新興市場投資信託，至今已經26年，剛好將人生三分之一嘅時間畀咗佢，可以話係佢嘅命根。有分析師估計，麥樸思可能只係想有多啲時間追求人生嘅其他目標，唔代表要離開基金。但又有人擔心佢嘅接班計劃有不確定性，如果作為「星級經理」嘅麥樸思真係退下來，投資者可能要搵定後路咁話。