何文田加多利山（Kadoorie Hill）原本只係處於太子道西與亞皆老街中間嘅一個小山丘，嘉道理家族喺八十幾年前以32.6萬元買入，將原本一片荒蕪嘅山頭建成豪宅區，所以山丘亦以嘉道理（Kadoorie）命名。
加多利山上只有兩條街道，分別係嘉道理道與布力架街。布力架與嘉道理家族當然有淵源，布力架（J. P. Braga）當年係嘉道理家族旗下建新營造嘅主席，建新營造就係負責開發加多利山。
目前加多利山一帶共有86幢洋房，連同聖佐治閣，全部由嘉道理家族持有，一直只租不賣，而大部份住戶都係長情租客，就算有錢亦唔係咁易租到盤。