啟晴邨食水含鉛量超標，再度提醒大家國產貨未必靠得住，連立法會財委會噚日審議啟德發展計劃區域供冷系統嗰陣，長毛都話擔心政府會再搵嚟自中國嘅承建商，仲大大聲問議事堂幾位議員，有邊個係用緊國產手機？冇吖嘛，咪就係因為質量差囉。
嚇到長毛語塞
中國的會爆炸是常識吧！長毛問得咁有信心，點知民建聯鍾樹根即時撲出嚟話，佢係中國手機嘅，令平時能言善辯嘅長毛都為之語塞。
八方以為Tree根咁愛國，用小米手機都唔出奇吖。但原來佢話實情佢用嗰部係HTC，即係由佢口中嘅「自由祖國」（相信意思係指台灣）設計，「社會主義祖國」（相信係指中國）生產。
Tree根咁用心良苦，將兩岸和平統一起嚟，相信唔少人都會笑佢名副其實Tree根。