原來海豹同人一樣，都會因為年齡同紫外線，增加患白內障機會。海洋公園噚日公佈早前幫館內最年老嘅港海豹做白內障移除手術，首次用上混合微創技術，唔單止可以減低傷口範圍，仲可以縮短康復時間。接受手術嘅雌性港海豹Rose，術後兩個月已完全康復，可以返太平洋海岸展館同大家見面。
兩個月後已康復
Rose06年被發現患上白內障，海洋哺乳動物監督蔡鎮業話，初時發現Rose嘅行為有啲古怪，「叫佢個名會周圍望，注意力唔集中，少少聲就好緊張」，雙眼仲有芝麻大小嘅白點，一年前白點更加覆蓋半個眼球，令光線冇辦法入視角膜，即係雙目全盲。因為咁Rose仲同其他海豹發生衝突，護理員惟有靠聲音訓練Rose，協助佢日常活動。
海洋公園獸醫總監馬伯樂話，因為Rose嘅情況越嚟越差，所以年半前開始計劃幫佢右眼做手術，仲首次用上混合微創方法，喺眼球開一個小切口，放入超聲波儀器，將眼球白內障嘅部份乳化再吸走，手術好成功，兩個月後Rose已經康復，所以園方計劃幫埋其餘4隻都有白內障嘅海豹同海獅做手術。