顛覆科技 - 左丁山

顛覆科技 - 左丁山

昨日講及電腦賓架M在校友會講Fin Tech,引起一眾校友極大興趣,大家問佢既然香港與紐約倫敦並稱國際三大金融中心,在金融科技方面,香港佔有乜嘢地位?賓架M話:「好慚愧,香港大大落後,倫敦穩居世界第一,在人才深度及科技寬度方面,無其他城市可與倫敦相比,Fin Tech市場估計價值100億美元,香港所佔份額,以比例計,係低單位數字,有排追。」
香港落後在邊一方面?瓣瓣齊,人才唔夠、資金唔夠,規條太緊……對左丁山呢一類市場派人士嚟講,所謂人才資金唔夠,多與監管太嚴有關。八達通壟斷交通、移動支付系統,係一個大障礙,但VISA與萬事達咭已與銀行合作開發智能電話(Android),作為支付工具,相信八達通遲早要被逼讓出部份市場。其實香港金管局成立以來,為咗嚴控金融穩定,幾怕新科技「顛覆」(disrupt)現行制度,不想脫離現行安全域(comfort zone),對新金融科技在金融機構之使用,從嚴審核,把關似鐵龍門,例如八達通至今不可含價值超過一千元。反而內地有後行者優勢,冇八達通技術包袱,一下子就向前躍進,在Fin Tech方面創新快過香港。我地問金管局是否重於防弊,多於興利?賓架M即刻話不予置評,講過第二樣。
賓架M話在中大學電腦時還是FORTRAN與COBOL世界,到電腦主打punch card,現在諗起,如在石器時代,畢業後進入商界工作不久,見到蘋果桌上電腦出現,從此電腦工業受到顛覆,連IBM都幾乎敗亡,世界不再一樣,其後又有九十年代初微軟視窗,九十年代末之互聯網狂潮,Google橫空誕生,又衍生咗YouTube、Facebook,蘋果在沒落再又彈起,推出iPhone,顛覆整個手機工業,將Nokia等趕出市場,同時又有Android出現與蘋果iOS競爭。佢話在Fin Tech方面,銀行鍾意Android嘅開放系統,因為iPhone有Apple Pay,想砌低銀行,係一個封閉系統。電腦、互聯網係經常產生「顛覆」科技公司嘅搖藍,例如Uber就顛覆全球的士行業。有一位年青意大利人來自拖連奴,出身快意車廠,年紀在30歲以下,走咗嚟香港設立OSVehicle,意圖顛覆整個汽車工業、賣汽車零件讓車主自己砌車,如到鴨寮街買電腦零件砌一架特別電腦一樣。上網Google:OSVehicle就知道情況。想搞新科技,唔駛等埋創科局!