上周內地股市大跌，不少股民越跌越心驚，一時間手足無措，夜晚睡不安寧，唔知仲要跌多幾多日。有議員喺「災後」向花生友分析呢場股災，一口咬定，這次係一場內地「反貪腐」同「貪腐」派對決，講得準確一點，係貪腐派向反貪腐的一次反撲。
呢位議員話，大家不妨睇睇呢次股災嘅開始時間，其實早喺6月時已經開始醞釀。如果大家仲記得，6月11日，中共前政治局常委周永康被判囚終身，拋下一句「服從判決，我不上訴」。整個6月，中央無論係減息、降準，其後到7月，甚麼要救股市嘅招數，統統出齊，但股市仍然跌不停，甚至唔少講股佬都覺得股市怪象連連。
江系為周永康反撲
呢位議員話呀，要有如此龐大嘅力度，背後一定要有龐大嘅利益集團先可以操控，其財力一定要有「國家級」，由「貪腐派」嘅周永康喺6月被判刑，股市就開始出現異動，然後股災嘅火舌喺7月吞噬唔少人嘅財產，時間上實在太巧合。佢大膽推斷，呢次係江系人物為咗周永康被定罪嘅一次反撲、報復，要向「反貪腐」大旗手、國家主席習近平還以顏色。
中央要股市升係國策，要與中央國策對着幹嘅，個膽一定好大。呢場股災喺中央連出數以十招下都不斷跌，實在嚟得太過不可思議，唔單止脫離正常分析，亦留下太多疑點，惹人「權鬥」嘅猜測實屬正常。
花生友