呢排唔少政界中人同八方吹開水，都問9月5號去唔去睇騷。邊個天王巨星表演咁巴閉，搞到政界中人引頸以待呢？原來佢哋係講緊由中大和聲書院舉辦嘅「九五之尊、王者盡出」慈善籌款夜，當晚會喺會展新翼大禮堂筵開近百席，唔少政界中人粉墨登場，載歌載舞為中大籌募教育經費。
唐媽媽跳華爾滋
講多無謂，有咩表演睇就最實際。身為中大「九五之尊籌款之夜」籌委會委員兼負責節目製作嘅葉潔馨向八方透露，當晚有唔少表演節目，總之令來賓目不暇給，包括「官場技安」周一嶽、「AO歌王」楊立門以及「法律界靚聲王」周永健會喺「樂隊至尊Bee Gees翻生」環節上陣，據聞仲有一位神秘嘉賓。就係太子珠寶鐘錶集團主席鄧鉅明。八方最希望佢哋唱歌之餘，都以Bee Gees造型亮相畀啲驚喜大家。
好多人誤以為中大校友先有份表演，葉潔馨話其實要多謝唔少港大猛人助陣，亦感激非兩大人齊齊獻技，好似唐唐媽媽唐尤淑圻咁吖，拍心口應承幫手，當晚夥拍前高官李麗娟表演宮廷華爾滋，有兩位跳得之人落場，肯定攞到唔少FUN同金。
據聞自由黨周梁淑怡同鄭慕智都會獻唱；李和聲會拉二胡，仲有喺美國百老匯表演嘅中大舊生，都會專程返港演出仙樂飄飄等精采節目，各位中大教職員同校友不妨邊睇騷邊做善長仁翁，買枱一圍盛惠3萬至5萬，每位門票則係5,000蚊，非中大善長贊助10萬元或以上都獲贈一席。預留門票或贊助可以致電查詢熱線3943 3980或3943 1637。
李八方
mailto:[email protected]