體壇拾趣：
女排「帥哥」鍾愛護膚品

世界女排大獎賽香港站禮拜四先開波，中國女排噚日就率先將戰場移師九龍塘，喺個人護理店同電器舖瘋狂血拼。咪睇佢哋球場外怕怕醜醜，一去shopping即刻戰鬥力up，一行17人消費超過10萬，最估唔到連「男神」張曉雅都咁貪靚，用咗成千蚊掃面膜同護膚品！
中國女排噚朝九點半殺入又一城，第一站獲個人護理店每人贊助$1,000，女將們頭都唔回就衝去護膚品區，連男性化打扮嘅「帥哥」張曉雅都用咗10分鐘揀面膜，最後佢除咗買幾盒面膜外，仲掃咗唔少護膚品，要攞多百幾蚊埋單。至於女排張常寧BB就最孝順，買咗兩盒加埋成千蚊嘅面霜送畀媽咪。

全隊「濕平」過10萬

逗留差唔多一個鐘，大隊就轉去隔籬嘅電器舖，今次每人獲派$5,000，最後當然係唔夠使啦，佢哋首先去睇蘋果產品，電腦、iPad全部唔放過，張曉雅喺度又買咗部電腦。而惠若琪同曾春蕾每人都買咗部攪拌機，小惠話：「𠵱個係媽咪要嘅，買嚟𠱁佢開心。」見到店內嘅卡通人物贈品，一班球員夾埋拎咗超過80件，連埋個人護理店嘅戰利店，球隊合共使咗10幾萬，滿載而歸返酒店。
「鳩嗚夠晒落力，下午返紅館練波都冇手軟。由於泰國噚日抵埗後取消訓練，中國就用埋空檔時間，足足練咗兩個幾鐘，備戰果然堅認真。