小米噚日喺香港正式發佈小米Note手機，不過呢部機半年前已經喺中國有得賣，唔算新鮮，好在現場有位靚仔哥哥做推介，成為唯一亮點。
呢位仁兄係小米國際產品總監叫宋嘉寧（Donovan），之前喺超人李嘉誠都有份投資嘅串流音樂App Spotify工作，約8個月前加盟小米，能操流利英文與普通話。
Donovan深明呢個新機發佈有啲滯後，好識做咁話希望將來可以縮短小米香港發佈新產品滯後嘅問題，等香港「米粉」可以跟中國同步買到新產品。
佢又指自己一直為小米與Spotify兩間公司穿針引線，希望可以令小米手機嘅內容更加豐富，只係暫時仲未有成果。
好鍾意自拍嘅Donovan，即場同大家分享幾張佢嘅selfie，當中當然包括佢跟小米老闆雷軍、國際部副總裁Hugo Barra嘅合照喇，唔知係咪想暗示自己好得寵呢？
講番佢今次力推嘅小米Note，售價冇乜驚喜，64GB賣2,999港元，睇怕未必啱香港消費者胃口喇。