諗極都唔明，點解有人噓自己嘅國歌，會令自己足總被警告；更唔明點解國際足協會話「如球賽受干擾，會進一步制裁」？點解球賽會因此受干擾？唔通對手會投訴「主場球迷自己歧視自己」？計我話，與其叫人唔噓國歌，不如用以下妙計，令球迷為國家歡呼！
咪嘴的秘密︰早前有歌手現場「咪嘴」演繹《眼淚的秘密》，俾網民嘲笑係《咪嘴的秘密》；足總不妨照抄：直播奏國歌時cut咗現場聲，改播國內球賽球迷熾熱合唱國歌嘅環境聲，領導人喺電視直播一睇，除咗為「民心已歸」而安慰，仲肯定會大讚：「港人普通話進步多了！」
熱門點唱︰把心一橫，索性抽起國歌，改由球迷投票點唱，咁就噓聲都變成歡呼聲！例如可以考慮用克勤嘅《紅日》，夠晒朝氣；志偉嘅《獨自去Kowloon》，襯番旺角；但萬一《日日去鳩嗚》或者《God Save the Queen》（英國國歌）當選，咁就……
絕招︰絕招？當然係「蛇齋餅糭」啦！只要入場，並且喺奏國歌嗰陣熱烈勁唱，就可以獲蛇宴、齋宴、月餅同咸肉糭券各一，一定吸引大批球迷唱出「國歌好聲音」！但呢班球迷可能國歌一奏完、波都未開就散水。最後，都係要警告各位，如果下次主場再有人噓國歌，有關人士可能會將球迷定性為與噓爆西班牙國歌、鼓吹加泰隆尼亞獨立嘅巴塞隆拿球迷混為一談；原來睇波都算係港獨分子！咁足球可能繼天九同德州撲克後，成為下一項被禁嘅港人最愛玩意。
方栢翹
now足球評述員