香港呢邊選緊港姐，歐洲球壇就係WAGs洗牌執位之時；曼聯喺呢個轉會窗夠爽手，但WAGs陣容就面臨削弱，湯卡華利女友祖芝娜正式bye，迪基亞女友艾杜妮亦相信時日無多，好彩有「小豬」舒韋恩史迪加強勢加盟，連同網球手女友伊娃洛域，睇怕曼聯新任「第一夫人」非佢莫屬！
曼聯WAGs陣容其實一向唔錯，好似基斯史摩寧嘅名模女友曲姬身材火辣，連迪加特嘅超模老婆比姬莉就夠冷豔，迪基亞嘅歌手女友艾杜妮更係人靚聲甜，仲有朗尼老婆高蓮……Well，勝在夠親切嘛。不過，曲姬講樣唔算好靚，比姬莉始終受老公「所累」難擔大旗，艾杜妮又分分鐘要跟迪基亞走人，唔通曼聯「第一夫人」之位要懸空？好彩小豬女友伊娃殺到！
我求大俠見伊娃啱啱喺溫網次圈玩完，自從08年上過世界第一後事業冇乜突破，反而場外生活仲精采。喺小豬捧完世盃同超模莎拉分手後，同伊娃嘅緋聞就越炒越烈，仲有傳已經秘婚；直至最近兩人愛得高調，小豬成日入場睇伊娃打波，伊娃上周日就陪番小豬去曼市體測。
西雅圖開操備戰國冠盃
伊娃周一晚喺ig貼張戴超自拍相，就咁呃咗三萬幾個like，網民不斷留言呼籲佢快啲嚟奧脫福之餘，又翻炒佢之前影落嘅黑色比堅尼相，唔使咩花款已經殺晒！另外兩位新兵達米安同舒尼達連嘅女友都幾清純可人㗎，但相對伊娃就低調好多，睇落冇乜野心要做頭號WAG。
講番曼聯，大軍周一抵達西雅圖就即刻開操，備戰四場國冠盃賽事。雖然只係輕舒腳頭，但睇落小豬心情唔錯，之後仲首次接受官網訪問：「曼聯係間大球會，我嚟呢度係要贏錦標，呢樣亦係曼聯習以為常嘅事。」
而英法兩地媒體先後爆料，話阿根廷翼鋒迪馬利亞已經同法甲巴黎聖日耳門傾掂個人條件，會以周薪20萬鎊簽約五年，轉會費就大約係4,300萬鎊，意味曼聯一年間帳面蝕成1,700萬鎊；亦有傳「天使」係同烏拉圭射手卡雲尼交換東家喎。
曼聯係咁增兵，要挑剔嘅話就仲爭個前鋒，英國《每日郵報》話雲高爾諗住撬埋拜仁射手羅拔利雲度夫斯基；雖然斷估拜仁唔會咁儍仔畀你連挖兩件主力，但如果羅拔仔位空手道女友安娜嚟埋，到時場外爭妍鬥麗仲精采呀！至於想睇曼聯踢國冠盃嘅球迷，除咗留意有線61及201台直播，now640台嘅《MUTV》都有得睇。
識睇，一定係睇足英台【英波Live】：
http://soccer.appledaily.com
http://bit.ly/engballlive