台灣最近流行飲紅豆水減肥，由名模隋棠話自己日日飲而帶起熱潮，身邊朋友現在去親台灣都買一盒二盒紅豆水飲品或沖劑返來，希望可以越飲越瘦。紅豆本身性質溫和，含豐富鐵質、蛋白質和膳食纖維，食紅豆沙或其他紅豆食品都可以吸收到以上營養，但就咁煲水飲又有冇用呢？
註冊中醫師彭明慧就話，紅豆水其實主要有利水的功效，對減肥並無直接幫助，但對於本身有水腫的朋友來說就可以收到利尿排水收身的功效。有水腫的人通常因為腎虛導致，所以煲紅豆水時加入陳皮就更可收補腎功效。彭醫師指巿面上買到的紅豆水可能加入糖份，多飲反而會致肥，也失去利水功效，所以還是自己煲的最為理想。不過，痛風患者就不宜飲用了！
紅豆水做法：
紅豆6兩浸4碗水30分鐘，大火煲紅豆水至滾起轉中慢火煲30分鐘。
這份量的紅豆水可以早午晚飲用約三碗，維持5日觀察成效；不過什麼原因導致肥胖、是否有水腫和有水腫又屬哪類型，當然就要親自問醫師最為合適啦！
記者：容慧心