【本報訊】Uber去年7月登陸香港，巨額燒錢補貼吸引乘客及駕駛豪華房車的司機加盟，雙方一度皆大歡喜。有曾成為Uber的司機表示，每日繁忙時間乘客用車須將收費加倍才會有司機接客，加上Uber推出多項補貼，令他們收入大增，「朝早7點半至10點已經可以搵到$2、3,000，放工時段都可以做到$2,000」，就算與Uber「二八分賬」後，平均一個月有6萬元生意，減去約9,000至1萬元油費及其他開支後「都有4.5萬元落袋」。他選擇一次過買斷新車，免卻供車負擔，「一般師兄若是用新款車開工，供車約8,000至10,000一個月」，都比的士司機收入豐厚。
但Uber早前大減車費三成，司機「做得多，賺得少」，惟有選擇「間歇性罷工」，只揀繁忙時間開工。部份司機選擇收費加倍時才開工，但收入仍遠較過去少，「𠵱家朝早7點至10點繁忙時間，都係賺400至500蚊，放工就有150至350蚊，仲要睇吓中啲單好唔好彩」。
■記者胡仲邦