大家都知道新世界發展 （017）主席鄭家純嘅女婿龐建貽熱愛葡萄酒，經營批發商「大亞洋酒」超過10年。上星期五，佢獲頒法國國家騎士榮譽勳章，以表揚佢對法國與香港之間嘅經濟與文化交流所作嘅貢獻。咁高興嘅日子，佢嗰位向來低調嘅太太鄭志雯都有現身支持。
龐建貽系出名門，屬於「鋼鐵大王」紹榮鋼鐵龐鼎元家族第三代成員，佢喺美國麻省理工學院材料科學與工程學系畢業後，走咗去法國波爾多區嘅酒莊學習釀酒，2001年就自己開設大亞洋酒至今。
喺商界裏面，賭王何鴻燊之女何超瓊2009年亦獲頒國家榮譽騎士勳章。
法國政府頒授嘅榮譽軍團勳章，係表彰唔同界別或軍事上作出特殊貢獻嘅法國以至海外傑出公民。榮獲騎士勳章，必須年滿35歲或以上，並至少對法國公共服務貢獻10年。