馮仁昭四圍超：周杰倫做老竇　昆凌剖腹誕女 - 馮仁昭

馮仁昭四圍超：
周杰倫做老竇　昆凌剖腹誕女 - 馮仁昭

恭喜！恭喜！周杰倫（周董）做老竇喇！佢老婆昆凌上周五（10號）已喺台北剖腹生咗囡囡 ，外界一直傳呢胎係仔，但結果係女至真，不過聽講佢兩公婆對囡囡出世都好興奮，𠵱家昆凌已轉去月子中心休養，周董就一直陪住老婆。
日前周董先至同老婆到宜蘭慶祝新婚周年，冇諗到咁快就入院生咗，不過囡囡出世後，周董仲好低調，冇即刻公佈喜訊畀大家知，可能佢怕傳媒知道後就會日日喺月子中心等，搞到佢好唔自在，可能想老婆返屋企休息後先至公佈喜訊，但喜事嘅嘢始終會有人爆料，有周董親友就話昆凌10號已經生咗。

周董同老婆昆凌本月5號一齊去咗宜蘭慶祝結婚周年紀念。微博圖片

好友留言恭喜

雖然周董想低調，但佢老婆昆凌喺facebook上面更換咗大頭相，將相換成係BB照，模樣超可愛，唔知係咪想暗示生咗BB，而不少好友留言恭喜，睇嚟佢老婆都係難掩歡喜，想同大家分享呢個喜悅。
撰文：馮仁昭

周董今年4月曾扮大肚宣佈老婆昆凌有咗。