啟晴邨喺鉛水風波越搞越大鑊，令到揭發呢件事嘅民主黨九龍西立法會議員黃碧雲亦人氣急升。八方聽聞唔少政圈中人好想知，到底人稱一嚿雲嘅黃碧雲，點解突然咁醒神？係咪有人提水叫佢抽水？黃碧雲自我解謎，話忽發奇想而有此作為。
黃碧雲喺7月初已經開記者會，話驗過啟晴邨啲水發覺有問題，當時政府死撐冇超標，同一嚿雲同區嘅民建聯立法會議員蔣麗芸卻質疑抽驗唔準確，事實卻還黃碧雲一個清白。
曾經因為喺議會投票撳錯掣而被諷稱「一嚿雲」嘅黃碧雲向八方笑稱，其實2012年入咗立法會後，佢被安排專責食物安全事宜，當時佢冇發夢反而忽發奇想，覺得食物可以驗，水質都一樣得，有人繼而建議驗住宅嘅食水，因為好多喉管都係大陸來貨，係咪聽到都巧京京！
結果黃碧雲以九西樓宇為網絡，連貴價樓如擎天半島都驗過統統冇事，惟獨啟晴邨出事。雖然一驗成名，但佢冇忘本，話要多謝大學教授同水質專家肯幫手就真。
九西女將出招跟進
觀乎九西各立法會女將，例如公民黨毛孟靜、民建聯蔣麗芸、經民聯梁美芬，連日就啟晴邨鉛水問題各自出招，提出跟進方法，就知一嚿雲呢鋪大發雌威，對選舉對手構成威脅，八方相信佢自己都估唔到，抱持乜都要試嘅心態，反而助佢殺出一條新血路。
李八方
mailto:[email protected]