【記者直擊】
經歷上周過山車式市況之後，中港股市昨日表現相對穩定，本報記者昨到九龍灣證券行直擊。
現場的投資氣氛明顯輕鬆得多，一班散戶有說有笑，但大部份散戶都對後市持觀望的態度，紛紛指要「睇定啲先」。
未敢撈底買貨
散戶周小姐指，現時買入的股份絕大部份都輸錢「綁住晒」，現時手上仍有3隻股份停牌，現時唯有長揸博反彈，「我嗰啲冇復牌嗰下死呢，啲錢擺晒喺度冇得郁」。
周小姐又指出，上星期港股跌二千多點時自己正在外遊，聽到消息時嚇一大跳，反問「𠵱家個環境，有邊個贏錢吖」？
她又表示，現時不適宜撈底，指（大市）「冧起上嚟冇辦法」。她直言外國問題（希臘危機）尚未完全解決，加上內地為救市「許買不許沽，啲人咪走嚟香港沽囉」，她認為，大市到8月才見底。
另外，散戶林太擔心A股大量復牌會「推冧個市」。她續指，大市差不多見底，但希臘危機令港股前景蒙上陰霾，會觀望兩日再決定。
散戶陸小姐則指，自己會留意細價股中建置地（261），至於長揸短炒則要視乎市況。