一向關注傷殘人士權益嘅「堅毅忍者．障殘人士國際互助協會」近日舉行「第八屆最積極會員暨堅毅忍者愛心大使頒獎典禮」，其間特別頒發「最具使命感傳媒大獎」畀過去一年為弱勢社群發聲嘅本地傳媒，《蘋果日報》靜態組憑住上年6月美荷樓青年旅舍嘅報道，成功獲獎，由堅毅忍者創辦人陳華昌頒發獎項，讚揚報道令公眾更正視無障礙設施嘅改善。
話說舊年《蘋果》收到一對來自台灣嘅傷殘人士夫婦報料，話嚟香港旅遊期間入住過美荷樓青年旅舍嘅傷殘人士房，點知發現房內得一張單人碌架床。記者事後請埋堅毅忍者一齊去「試住」，揭發間房有多個設計錯誤，無視傷殘人士需要，事後青年旅舍就為此作出改善。