華將呂卓賢2012年9月開始在港策騎，第一匹頭馬係為師傅姚本輝勝出「正白旗」，賢仔有過光輝歲月，曾經做過兩屆冠軍見習騎師，但估唔到佢嘅策騎生涯咁短癮，上周五牌委員鑑於佢犯規太多，不再向佢發牌，在港出賽唔夠三年就要轉行。
不過對賢仔嚟講唔係世界末日，據知佢希望加盟告達理馬房做騎馬人，向幕後發展。講起大告，真係比任何練馬師都要錫呂卓賢，剛季賢仔七場頭馬，佔五場出自告廐，包括喺二班高水準賽事，合作贏落飛馬「陽明囍囍」，力壓實力強勁嘅「追風駿足」，可見大告真係好信任賢仔，直情當佢半邊仔咁！
講開又講，大告同「卓賢」的確好有緣，除咗呂卓賢，原來大告細仔Martin又係叫卓賢，佢同哥哥告卓華一齊喺新西蘭練馬，短短兩年已贏過一場二級賽，啱啱喺沙田初出得季軍嘅「僥倖」，來港前正係由一對囝囝打理，既然大告有力培育兒子卓賢成材，話唔定另一卓賢喺佢教導下，他日亦可喺馬房創一番事業。