馬會宣佈由下月1號起，賽馬和六合彩攪珠，將改由無綫電視J2頻道轉播。
身為亞視六合彩之子蔡國威，被問到亞視冇得播六合彩，會否感到可惜？佢話：「換言之我哋做到7月30號最後一次，都會有少少可惜嘅，我都做咗六合彩節目10年，當係放一個長嘅假期囉，始終因應住牌照問題，所以0依家喺J2播，都係一件好事嚟嘅，比香港市民覺得唔會永遠喺亞洲電視睇到賽馬同六合彩，可以喺第二個平台都見得到，比新鮮感市民，將來再合作或再做就再算啦。自己感覺雖然有小小可惜，但人生何處不相逢呀？可能呢個係放暑假咁。」
問到亞視最後一次邊個主持？蔡國威表示：「如無意外應該係我做最尾嗰期。」問到係咪好感觸或者好榮幸，完成歷史任務？蔡國威說：「冇感觸亦冇話好榮幸，呢個係我工作一部份。我只會盡力做好，比觀眾留下一個好印象。」
咁TVB邊個做六合彩主持？蔡國威說：「暫時唔清楚，等番TVB會同馬會公佈。」係咪唔捨得？蔡國威話：「少少，始終有個感情，天下無不散之筵席，話唔定將來有機會做番呢。唔捨得點都會有小小，但正面啲去睇，當放個假先。」
咁同亞視合約今個月完？佢話：「同六合彩係差唔時間完嘅，但0依家公司有新老闆新工作，我都有份，其實呢個moment我都喺度傾緊，會唔會繼續go on，但暫時一切都未定。」
有指2012年落選國際中華小姐范文雅，任六合彩主持呼聲甚高。29歲嘅范文雅中英文流利，試鏡當日表現淡定，係一眾候選人中，表現最好一個，佢現時正接受主持訓練，待馬會同意及通過後，有望當上《六合彩》新主持，但馬會亦有可能自行委派主持。