高銀系大股東潘蘇通真夠霸氣，佢兩間上市公司高銀地產（283）與高銀金融（530）嘅股價，由5月中高位至今累計下跌超過70%，令佢身家大幅縮水，但佢依然唔怕接受傳媒訪問，上星期坐喺位於中環IFC嘅寫字樓接受英國《金融時報》專訪，不斷話公司股價走勢對佢冇乜意義喎。
潘蘇通講來講去都係想話，佢冇喺高位沽貨，亦冇抵押股份借貸，總之冇利用股價短期走勢獲得利益，強調「我係一名商人，並非交易員」。
呢位富豪近月仲創辦咗一本奢侈品雜誌，用埋自己個名做生招牌，叫《朗潘（Le Pan）》，主要介紹葡萄酒、美食、時尚，呢期有一篇文章提到「私人飛機不再是身份象徵，而是必需品」，認真巴閉！