今、明兩年有區議會同立法會選舉，政黨、政團都密鑼緊鼓部署，花生友知道，各大政黨都有做民調供內部參考，睇吓派邊個出選最有勝算。
上屆一席都冇
民主黨上屆立法會喺新界西部署失當，加上民建聯完美配票連取3席，令白鴿首次喺新西一席都冇，為咗重奪新西議席，該黨穩陣計，明年選舉傾向只派一張名單參選。
講開新西選情，點都要提下2012年發生乜事先，當年民主黨李永達同太太陳樹英夫妻檔出戰新西，分拆兩張名單，結果李永達以不足1,000票輸畀民建聯梁志祥，爭唔到最後一席，但佢同老婆夾埋得票係58684，絕對夠爭1席。當時就有意見指，民主黨見到公民黨郭家麒由余若薇抬轎搶票，早就應該變陣「棄保」，保得一席得一席。
經此一役，民主黨傾向新西只出一張名單，而目前有至少3人排緊隊爭凳仔，分別係副主席尹兆堅、寫愛情小說而人氣高企嘅元朗區議員鄺俊宇，同再接再厲勢要殺入立法會嘅陳樹英，最終花落誰家，未來一段日子嘅民調走勢，相信係重要參考。
其實年底區選嘅成績，對明年立法會選舉有指標性，好似新界東因為「民主思路」湯家驊辭去立法會議員一職而出缺，花生友聽聞，自由黨都有意派人出戰新界東補選，就算贏唔到，當練兵都好，至於有乜人選，就要等區議會選舉之後，計吓各區得票決定去唔去馬。
花生友