阿爺傾盡全台人力物力救市，A股上星期總算有個似樣的反彈，守住滬綜指3400至3600的關鍵位，暫時避過新一輪孖展斬倉潮。雖然市況喘定，但當你總結一下中央近日究竟出咗咩招數時，你就會發現大家其實仲未飲得杯落。
中央為咗救市，到底去到幾盡？招數包括禁止上市公司大股東減持；將沽空活動變成「惡意」及非法；逼使曾經沽貨的大股東/高管嘔番嚿錢出來買股票；容忍1,400間上市公司「扮有事」停牌。意味中央是在盡最大力度凍結市場的沽壓，再配合人行無上限放水予中證金公司，支持券商買股票、基金，才叫勉強頂住萬千散戶的孖展斬倉及恐慌性拋售。但沽壓會否從此就消失呢？昨日有超過400間A股公司申請復牌，不少一開市即告跌停；而目前仍在停牌的公司，佔整體上市公司數目達36%。避得一時，唔避得一世。
要解決槓桿所造成的泡沫問題，惟有去槓桿才是終極之道。目前起碼要等那堆停牌公司逐步復牌，觀察大市能否承受，才可判斷這一關是否已過。中央最理想的劇本，是靠人行現時給中證金的大水喉，長期為券商提供彈藥買股，頂住大市不急跌，直到止蝕的投資者沽乾沽淨為止。
咁阿爺接到成手貨，之後點算？或者是海迪過慮了，事關近日市況才剛回穩，即時已出現番內地大媽再借錢炒股、希望把輸咗的錢贏回來的新聞。海迪想起網民的一句惡搞：Keep Calm and Believe in Communism。
海迪