一班新來港嘅基層婦女就靠佢哋一對手，喺社企「恩之手」學做手工皂、針織同皮革產品，再擺上網賣幫補家計。
07年來港嘅嚴順英話啱啱嚟生活好艱難，「成日喺屋企對住四面牆」。同爛賭老公離婚後湊住兩個仔，靠積蓄過活，「廣東話唔準，連7-11都唔請」。一家住喺土瓜灣唔夠100呎嘅劏房，直至識咗香港聖公會福利協會社工，幫佢申請綜援，參加埋福利協會旗下社企「恩之手」嘅課程培訓，學做手工藝品，「終於覺得自己有用，開始融入香港」。
負責「恩之手」嘅社會創新項目經理程麗麗話，希望透過培訓令基層婦女有一技之長，課程完咗會邀請佢哋加入生產線，賺取手工費，產品會透過網上平台同市集賣，仲接受訂購㖭。詳情可以上呢個網址 http://goh.skhwc.org.hk/ 。