31歲本地騎師黎海榮，煞科日策沈集成馬房「知道勝」跑第三，直路上跑法礙眼，賽後被現場馬迷及網民批評，競賽董事小組當日作出研訊，並押後到周二(14日)早上審理。
今次黎海榮處理「知道勝」，專業評馬人方駿暉指最惹爭議是轉入直路開始，當時居內欄中間位置競跑的「知道勝」，移往外欄望空冇問題，但望空後唔覺黎海榮有力騎，最後350至250米，騎吓停吓，即使最後幾十米開始上前，但打鞭及催策力度，跟以往比較差距甚大，相比同日尾場策蔡廐「華恩庭」跑第四嗰種勇猛係兩個人，結果「知道勝」只落後頭馬「綠野仙踪」個半馬位跑第三。
賽後不少網民批評黎海榮，認為他軟手軟腳，更有指巫斯義在「精彩鬥士」一案要停賽15個賽日，黎海榮亦恐難逃重罰。
由於馬季已收鑼，騎練、馬主及馬會高層要放假，如練馬師沈集成周三將去澳洲玩，因此「知道勝」研訊趕快在周二進行。
唔講唔知，黎海榮個底好乾淨，從騎11年冇衰過未盡全力條例，究竟今次能逢凶化吉，好快有分曉。