每逢選舉前夕，梗有唔少抹黑嘢出現。大埔區新富選區嘅選民一定留意到，隨住周日（19日）嘅補選逼近，近日信箱不停被一啲抹黑工黨秘書長郭永健嘅匿名函件（圖）塞爆，內容不盡不實，包括話郭永健涉嫌收受政治黑金、倡導同性婚姻、參與佔中被捕等，工黨發聲明話單張旨在抹黑郭永健呢位補選候選人，噚日已向廉政公署同選舉事務處舉報，將涉案函件交畀廉署調查。
工黨話有別於過往同類的事件，今次嘅抹黑函件係郵寄畀全區大部份住戶，當中牽涉嘅人力同財力非常龐大，工黨力促廉署嚴肅調查這種違法行為；對於競選宣傳站曾經被多名「紋身青年」包圍，妨礙拉票，工黨亦予以譴責，強調不容許有人以不當的手段，意圖影響選舉結果；呢次補選尚有另外兩名候選人羅曉楓同何萬傑。