校友會舉行午餐例會，要搵人演講，本想順便叫證券界嘅校友講幾句股市救市，點知演講人就容易搵到，證券界校友就不見於報名名單上。召集人電腦Y於是打電話叫幾位分析師、基金經理出席，點知收到嘅回覆都係一樣：「喂，師兄（或師弟），搵食緊要，呢排股價大上大落，老細唔講，我地都冇一個敢出外食午飯，食咗成個星期飯盒/三文治嘞！」
都好，今次唔講股票，聽講者講Fin Tech（金融科技）反而好有趣味性，左丁山呢類電腦科技盲，尤其覺得好玩。今次搵到嘅講者，既係賓架（銀行營運總監），又係電腦專才（一個電腦專業團體會員），在中大聯合書院電子系畢業，從事資訊科技專業多年，屬專家級。呢位電腦賓架M有巴閉之處，就係曾經受教於三大名師，即高錕、陳之藩、陳天機。問佢印象最深刻係邊位，佢話：「難分高低，我一生人最夠運就係上過佢地嘅堂，有一次讀完『在春風裡』、『劍河倒影』，旅行之後就寫咗一篇遊記，膽粗粗交俾陳之藩先生校正，點知陳教授肯讀完改正幾句，仲讚我寫得好，令我飄飄然，以後成日學寫文。不過畢業之後，面對生活現實，做唔成文藝青年咯。」
嗰一代大學生，不分文理工商醫，都好可能讀過「在春風裡」與「劍河倒影」，視普林斯頓教授陳之藩為偶像，點知佢後來到咗中大聯合書院教書（那時崇基新亞無電子系），中大生當然視之為明星。好嘞，講番Fin Tech，賓架M話範圍太廣，午餐得二十分鐘講嘢，只講「移動支付」一項。佢話香港因為太早有八達通，八達通壟斷晒，但現在已成為落後科技，反而窒礙香港創新，遠遠落後於中國大陸之微信付款功能。自有智能電話之後，本港銀行已着力研究透過Android系統開發「沒有咭的信用咭」，在智能電話加入新軟件，VISA與MasterCard已可植入手機，大可「拍機付款」兼得積分，遲啲到年尾左右，香港會推出電子支票（e-cheque），如果流行，以後大銀行可省回大量處理紙支票嘅時間與成本，譬如IPO後，退還支票一兩萬張，用e-cheque就非常方便，唔駛做死伙記。內地已可利用「微信」開發出Shake Shake，四個人打完麻將找數，搖一搖個智能電話，就可以互相過數入銀行戶口，又開發出Deerling Payment，到名店買手袋，將手袋連價錢牌影張相，上載群組，等一眾男友去bid付款，或者老公直接透過電話轉錢入名店銀行戶口，女士就拿着手袋鬆人。呢啲新技術，香港仍未做得到。