一年一度嘅香港書展本周三（明天）開鑼，香港人愛講股樓，教人投資股票、樓市嘅書籍總會佔一席位，今年除咗有大家見慣見熟嘅作者曾淵滄、黃國英、湯文亮，80後電台主持梁心欣都加入戰團，想吸納年輕投資者；最有趣可能係講開馬拉松嘅康宏金融（1019）主席王利民，忽然出書教煮餸，認真各適其適！
【王利民 揸鑊鏟教中菜】
作為康宏（1019）主席王利民嘅facebook朋友，知道佢出食譜，其實唔會感到好意外，事關佢好鍾意喺屋企下廚，跟王太撐枱腳，每當見佢話想簡單煮個家常菜，然後上載一張咖哩炒蟹嘅相，就有unfriend佢嘅衝動。
佢兩個月前決定出書教人煮中菜，希望畀一班覺得煮餸好難嘅人睇，等佢哋知道，只要肯學肯煮就一定煮到，即使係餐廳大廚嘅名菜，一樣可以做得到。
佢本身都係6、7年前先至開始愛上下廚，閒時翻閱食譜跟住做，整到𠵱家自己出食譜。
【梁心欣 股市未升完】
「80後」梁心欣除咗喺電台做主持講股票，亦會喺facebook講投資心得，有出版社見𠵱家坊間冇乜後生女仔寫書教人炒股票，於是搵佢合作，佢都希望可以吸引一班年輕嘅女性讀者。正如孫柏文所講，佢本書可能好適合港女睇。
梁心欣第一次出投資書，主要都係講投資心法，分享自己嘅經驗，講下自己點樣由記者走咗去講股票。雖然近期中港股市嘅走勢如過山車，但佢堅信股市未升完，只係中間震盪，呢個時候，應該有好多人想睇書學操盤咁話。
【曾淵滄 唔會開簽名會】
擁有大量粉絲嘅經濟學者曾淵滄，每年推出幾本財經書，部份係新寫，部份係將報紙、雜誌專欄嘅文章集結成書，佢最新推出《富足自由人2》。
佢話，冇因為配合書展檔期而出書，總之到時到候就會有新書推出，市旺、市靜對佢著作嘅銷情都冇乜影響。
既然並非為書展出書，大家當然亦都絕少見到佢出席新書簽名會。佢直言「簽名會對我冇任何好處，又怕被人捉住問呢樣問嗰樣」所以佢從來唔去書展，最重要係，佢認為，真正嘅投資者係唔會去書展買財經書嘅。
【黃國英 唔怕跌市滯銷】
基金經理黃國英（Alex）相隔兩年再出新書《泡沫順風車》，Alex呢幾個月忙住喺港股大時代搵食，本身分身不暇，所以新書內容主要係結集佢喺雜誌同報章嘅專欄，但對粉絲嚟講，都係一個唔錯嘅收藏選擇。
可惜《泡沫順風車》6月上架後，就即刻遇着跌市，就連Alex自己都呻黑仔。但佢有唔少追隨者，一講到銷量就話冇有怕，皆因佢大約10年前曾經出過一本《自己做基金經理》，大賣過萬本，打入財經書籍十大銷量榜，佢保守估計，今次或者可以賣出3,000至4,000本。
【湯文亮 爆煲論再抽水】
《細價樓爆煲論》作者湯文亮，自從年頭語出驚人之後人氣急升，今年書展雖然冇新書面世，不過佢近兩個月都出版咗兩本書，打算喺書展力谷。
一向滿肚墨水嘅湯文亮，因為一句細價樓即將爆煲而爆紅，上個月完成新作《玫瑰玫瑰我愛你──細價樓爆煲論後的反思》，講冇晒物業投資者嘅樓市，連同之前《細價樓爆煲論之始末因由》，會有兩本書出現喺書展。湯文亮話，兩本書已賣過萬本，希望書展可以再谷多一浸銷量。
李華華
mailto:[email protected]
