而家A股癲過大時代，有近一半股份停牌避難，剩低一半股份，呢幾日唔係幾乎全部跌停，就係幾乎全部升停。搞停牌與復牌，已經成為A股最重要財技。高層之前要絞盡腦汁諗停牌理由避股災，而家又要度復牌理由食盡升浪，理由千奇百怪。
例如，紅豆股份7月8日宣佈，正與清華大學談判合作，所以要停牌。見到7月9日股市大升，馬上宣佈談判破裂，7月10日復牌。其他股份包括雙良節能、金瑞礦業，都用呢個談判一夜破裂理由來復牌。
最犀利係樂視網，7月8日話要增加智能終端重大投資而停牌。到夜晚就話，公司已經推出GPS應用程式，所以7月9日就復牌。即係話，唔到24小時，就已經完成呢項重大投資！之後就連續3日升停板。轉得咁快，難怪可以成為創業板龍頭！
黃尹華