曼聯快刀斬亂麻，意、法、德國腳各執一件；對頭人曼城，艱苦搶到全歐洲最值錢嘅土炮史達寧（圖），卻失另一更重要嘅戴爾夫，「藍月亮」曼城，先輸一仗！
搞足幾個月，曼城終要叫到4,900萬鎊先買到「紅軍叛兵」史達寧，主帥羅渣士上季中已立心打拉布，吊高呢位叛兵嚟賣，所以利記今夏瘋簽主要六將後，轉會收支即時平衡；呢個價，更幾近係剛過去周末，宿敵曼聯用5,300萬鎊勁簽三個歐洲國腳嘅總轉會費，藍月亮要重奪聯賽冠軍，闊綽交易陸續有來。
舒尼達連接住「小豬」舒韋恩史迪加，突又去成曼聯合組鋼鐵雙防中，或者史達寧天價「紅轉藍」，呢啲「大刁」多人關心，不過曼城痛失阿士東維拉中場戴爾夫，影響唔細。藍月亮今夏組軍唔順利，之前簽咗個土耳其新星，唔會即時起到作用；正選陣容，原本除門將赫特外，英國人走晒，正選球員平均年紀亦係英超最老，「九十後」，只得上季加盟嘅法國中堅文加拉一位，所以今夏求「英」若渴。有史達寧加盟，可以增加活力，但同位置有攻中大衛施華、拿斯尼，甚至箭頭阿古路及韋菲特邦尼；若果史達寧喺曼城被安放右翼，作用與之前傳出加盟嘅阿仙奴翼鋒禾確特無異，淨係掛住「三獅翼鋒」個爛鬼招牌，值呢個價咩？
各英超隊，今夏主力揼本搶中場新兵；戴爾夫反口，戀棧阿士東維拉隊長一職，唔肯800萬鎊過檔曼城，睇落幾神奇。維拉都啱啱用咗500萬鎊喺法國里爾，搵咗個非洲防中伊祖沙古爾替戴爾夫；而曼城嘅中場台柱耶耶托尼畢竟已32歲，兩個「費蘭」（費蘭甸奴同費蘭度法蘭斯高）又難成大器。已躋身大國腳、上季聯賽場均錄得59.8次傳送及5.2次高波，為維拉之冠嘅戴爾夫，其實跳到大會曼城非常正路；唔知係咪驚曼城係「英國人墳墓」，近年加盟嘅魯迪維爾，史葛冼佳亞，新星即變鹹魚有關？
另一邊，曼聯主帥雲高爾今夏唔使忙世界盃，果然做到嘢，只要簽多一位頂級前鋒，不得了。戴爾夫拒投，曼城冇得慳，祖記嘅法國防中保羅普巴，或者阿仙奴嘅土炮韋舒亞，會係最好嘅選擇，現時組軍落後對家一條街，唔通今季又玩前季後上稱王呢招？
波神