NBA轉會市場呢幾日交投淡靜，唔少球迷就開始將注意力放去夏季聯賽度。雖然自從「易帝」易建聯三年前離開之後，中國球員已經再冇喺聯盟出現過，但係𠵱家中國又有新希望嘞！
幫塘鵝打夏季聯賽
24歲嘅賀天舉，𠵱家幫塘鵝打緊拉斯維加斯夏季聯賽，呢位身高6呎9吋嘅前鋒，強項係跳投同搶籃板，之前喺CBA效力遼寧，係上季總決賽亞軍功臣。上周先啱啱到埗加入塘鵝訓練營嘅佢，承認嚟到呢個節奏快、對抗性強幾倍嘅環境，自己都慢慢適應緊，但睇嚟進度唔錯。據報喺日前嘅分隊對抗賽，佢喺五分鐘內轟入七分；而上周五、六先後贏公鹿同小馬嘅比賽，佢都有雙位數嘅上陣時間，分別貢獻咗九分同四分，成績都唔錯。
雖然賀天舉英文麻麻，要同行嘅遼寧隊副總經理Michael幫手做繙譯，但語言障礙唔係一個大問題；要達成加入NBA呢個夢想，最重要都係睇佢表現。呢兩場都有去觀戰嘅塘鵝主教練根道爾（Alvin Gentry）就讚佢射程夠廣，係一個好好嘅射手，仲鼓勵佢一有機會應該多啲起手㖭。
