人誰無過？最重要都係知錯能改箒。咪以為花生友喺度講埋啲阿媽係女人嘅無謂嘢，查實呢啲感慨內心話，係唔少建制派嘅心聲，因為政改缺席投票，搞到佢哋受到支持者猛烈批評，據聞唔少會內、會外嘅「謝罪會」，建制派議員都淚漣漣，向支持者耍冧話以後唔會再犯低級錯誤。
花生友都有問過唔少建制派，到底支持者對佢哋缺席投票嘅怨氣，係咪已經全消？唔少人嘅答案都話呢筆賬，未必會咁快一筆勾銷，但佢哋仍然相信忠實粉絲，唔會咁易變心，所以唔擔心喺選舉中得票減少。嘩，點解咁有信心？有建制派中人話呀，始終支持建制嘅市民同支持泛民嗰批人，完全係兩個type，好少因單一事件而轉投對家。
咁撇除民建聯同工聯會呢啲愛國愛港紅噹噹嘅政黨，新民黨會唔會受影響多啲呢？話晒都係主打中產，同民記工記嘅基層支持者有分別喎，唔會因為葉劉、田二少唔投票而嬲嬲豬咩？有建制派中人話，對新民黨嚟講，政改唔投票嘅影響或者相對地係大啲，但佢笑指，查實西環對新民黨都愛護有加，如果配票得宜，相信唔會影響選情。反而呢位建制中人話呀，要留意嘅應該係自由黨，佢哋認為部份支持袋住先嘅溫和派市民，或會因為政改一役由泛民轉投自由黨，承認喺政改中最多意外收穫嘅，非自由黨莫屬。
花生友