行會成員陳智思最注重飲食健康，佢被委任為降低食物中鹽和糖委員會主席之後，更加名正言順，食飯一定要少油鹽糖。
人在香港，佢當然可以自己話事，點食都得，但如果去外地出差，真係唔係咁容易食得健康，不過大家唔使替佢擔心，佢每次出差必備幾塊雜莓多士，仲帶埋小型多士爐上機，隨時可以喺酒店房內焗片多士當一餐。
陳智思本身幾鍾意食麵包，喜歡麵包有少少甜味，佢近年喺中環置地廣場嘅快餐店Urban發現一款雜莓多士（每片17蚊），一食就愛上。
從此，每次出差，尤其飛往內地，佢一定帶4、5塊傍身，事關內地好多食肆嘅食物都比較油膩，佢未必啱食，喺呢個時候，佢就會拎出私伙多士爐，焗一片多士當一餐，有時一日兩餐都係佢。
特別係每年3月北京舉行兩會期間，佢差唔多有兩星期留喺內地，佢喺中間多數會往返香港，再飛北京前，佢又會走去買多幾塊雜莓多士北上。
奉行少食多餐嘅佢，不停形容呢塊多士好厚，又有果仁與雜莓，夠晒飽肚。不過老實講，真係唔係人人食塊多士就夠飽囉，係佢先得㗎咋。
記者：高淑嫻