好多人覺得淡市先會多人當嘢，其實旺市生意仲多，靄華押業（1319）嘅CEO陳啟豪（Edward）話，股市大時代開始，有三成抵押物業借貸嘅客人，都遲咗還錢，想喺股市賺取更加多嘅回報，因為貸款年利率先過10厘，「嗰時啲股升一日都賺返呢個成本」。
不過近排股市就插得幾應，呢班人有無蟹咗，真係大家心中有數，Edward就無透露啦，不過由於係有抵押嘅貸款，所以風險仲係好低。
佢話呢批客都係高資產淨值嘅有錢人，「唔止一層樓，可能有三、四層樓」！查實好多年前內地有班生意佬投資移民嚟咗香港，仲買咗好大批物業，有資金需要就會押咗個物業套現。
有啲客除咗用嚟炒股，好多借錢嘅，都會用嚟接濟內地嘅生意，「例如前排有筆5,000萬元貸款，借錢嘅係知名內地企業家，做啲生意好似房地產或光伏等，喺大陸好難融資，所以搵咗我哋。」