萬眾期待，謝拉特喺上周六終於首次代表銀河上陣，喺國冠盃銀河迎戰CF阿美利加場波正選上陣踢咗半場，踢得好搶鏡就講唔上，叫做交足功課。銀河贏波唔係靠謝四，而係由羅比堅尼扳平下終以2:1反勝；羅比堅尼曾經喺利物浦同謝四做過隊友，表現就麻麻；但佢呢幾年喺銀河撈得好掂，謝四嚟到美國，隨時都要靠佢射住。
踢半場寓賽於操
今年夏天，老臣子告別效力多年球會特別多，謝拉特喺七歲就加入利物浦青訓，到98年首次代表一隊上陣，今夏終於離開呢支佢喺英超唯一效力過嘅球隊，轉投銀河。雖然已經35歲，但謝四仲相信自己嘅足球生涯會有作為，上周六國冠盃開打，首戰由銀河迎戰嚟自墨西哥嘅CF阿美利加，教練艾連拿就派謝四正選披甲，實行寓賽於操。
謝拉特獲安排佢擅長嘅中場中位置，喺上半場都幾多波掂，不時施展吓佢嘅招牌長傳，亦有幾次埋門機會，最有威脅一次係喺21分鐘右路殺入禁區施射，可惜被對手門將曉高干沙利斯撲出。銀河喺開波八分鐘就先失守，去到完半場前由羅比堅尼扳平；換邊後謝四已經被收起喺場邊休息，主隊喺80分鐘由前鋒阿倫哥頓入波奠勝，以2:1反勝對手。
謝拉特喺賽後話：「第一次代表銀河上陣感覺好正，對手實力唔錯，所以都有啲難踢，我哋喺開賽15分鐘後先企穩陣腳。我相信自己喺銀河會踢得越嚟越好，同隊友有更多磨合之後，表現會再改善。至於體力方面，老實講係有少少難應付，始終都有六、七星期冇踢正式比賽，嚟緊周二銀河會有比賽（美聯盃作客皇家鹽湖城），希望都有機會再落場踢吓，為周五（美職聯主場對聖荷西地震）做好準備。」教練艾連拿喺賽後都有讚謝拉特嘅演出，亦會喺周一再觀察吓先決定畀唔畀佢喺美聯盃上陣。
隊長身份互換
羅比堅尼喺08/09球季加盟利物浦，跟隊長謝拉特搵食，不過表現完全唔符合佢當時2,000萬鎊轉會費嘅身價，結果好辳咁喺半季後割價返去熱刺；今時唔同往日，羅比堅尼喺2011年加盟銀河，效力咗四季，三次幫球隊贏總冠軍，上季仲獲選埋MVP，亦係𠵱家銀河嘅隊長；謝四嚟到，真係靠呢位半個鄉里多多關照，當然謝四都好識撈，熱身時有着住紅軍波衫嘅小球迷同佢擊掌，佢都只係低調拍一拍，似乎唔想得失新老細喎！
識睇，一定係睇足英台【英波Live】：
http://soccer.appledaily.com
http://bit.ly/engballlive