公安部要嚴打惡意沽空，但內地法律並冇呢條罪，但要砌得入，都要花一番工夫。上周五中證監就畀咗個好玄的定義，話「跨市場、跨期限的市場操縱行為，屬於惡意沽空」，但就冇解釋。有江湖傳聞話，首輪祭旗的，可能係之前搞出大頭佛的配資公司。中證監之前一路想收拾配資，但苦無門路，今次可能借公安整頓。
本欄提過A股前排1點鐘左右例牌勁chok，2點過後插水。因呢段時間，配資公司會用短信或微信call客戶補孖展，搞到市場人心惶惶。而家內地流傳另一版本，話其實配資公司每日下晝開期指淡倉，然後1點鐘全世界call孖展，人為製造恐慌。
按中證監定義，咁樣期指、現貨跨市場操縱，就一定屬於惡意沽空。上述陰謀論難分真假，但阿爺要砌，就一定有辦法。
黃尹華