南韓政府可能因為嬲嬲豬，不滿特區政府早前喺南韓爆發新沙士期間向韓國發出紅色旅遊警示，影響佢哋旅遊業，所以嚟個大報復，南韓外交部上周四突然因應香港嘅季節性流感，向香港發出最低級別嘅藍色旅遊警示。
唔少港人覺得，南韓咁樣做有啲小學雞囉。港大醫學院院長梁卓偉（圖）噚日就話喎，南韓嘅做法非常奇怪，理據亦唔成立，可能南韓睇到香港今年至今有490幾宗流感死亡個案，覺得遠超俗稱新沙士嘅中東呼吸綜合症喺南韓嘅死亡數字，所以發出旅遊警示；但佢話查實香港今年嘅季節性流感並唔嚴重，而香港係全球其中一個最公開流感死亡數字嘅地區，其他國家可能唔公佈㖭。佢強調全球每年都有流感高𥧌，實施邊境措施意義不大，但新沙士係新發傳染病，梗係要防患於未然。